Lítið er vitað um hvað verður um PFAS í umhverfinu en ný rannsókn leiddi í ljós að ákveðnar bakteríur í frárennslisvatni geta brotið „eilífðarefni“ niður. Þar með geta þessar bakteríur dregið mjög úr langlífi eiturefna á borð við PFAS.

Niðurstaðan vekur vonir um að hægt verði að þróa ódýra aðferð til að hreinsa vatn sem inniheldur PFAS.

PFAS eru efni, búin til af mönnum, sem eru notuð í margar vörur. Þau innihalda sterk efnasambönd sem brotna eiginlega ekki niður og því er erfitt að losna við þessi efni úr líkama okkar og umhverfinu.

PFAS hefur verið tengt við margvísleg heilbrigðisvandamál og því er full þörf á að hreinsa vatn sem PFAS finnst í.

Live Science segir að í rannsókn, sem hefur verið birt í vísindaritinu Science Advances, komi fram að fjórar tegundir Acetobaktería geti brotið niður efnasamböndin í sumum PFAS.  Þetta niðurbrotsferli er knúið af ensímum sem kljúfa efnin og losa um flúoratóm sem myndu undir venjulegum kringumstæðum drepa bakteríurnar. En Acetobakteríurnar hafa sérstakar rásir sem dæla flúori út úr frumunum og út í umhverfið og gerir þetta bakteríunum kleift að lifa þetta af.