Dómari í máli manns sem dæmdur var í lífstíðarfangelsi árið 1996 fyrir að myrða föður körfuboltagoðsagnarinnar Michael Jordan hefur hvatt til þess að maðurinn fái reynslulausn, nú 28 árum síðar, úr fangelsi. Morðið, sem átti sér stað í heimaríki Jordan-fjölskyldunnar, Norður-Karólínu, sumarið 1993, átti mikinn þátt í því að Jordan hætti körfuboltaiðkun um haustið þetta sama ár aðeins þrítugur að aldri. Hann snéri þó aftur á körfuboltavöllinn um einu og hálfu ári síðar.

Í umfjöllun NBC kemur fram að hinn dæmdi morðingi heiti Daniel Green en hann var sakfelldur ásamt Larry Demery fyrir morðið í réttarhöldum þar sem Gregory Weeks var dómari. Mennirnir voru báðir 18 ára gamlir þegar ránstilraun þeirra endaði með því að þeir urðu Larry Jordan, föður Michael, að bana.

Weeks hefur mælt með því við nefnd sem úrskurðar um reynslulausnir í Norður-Karólínu að hún samþykki umsókn Green.

Morðið átti sér stað með þeim hætti að Larry Jordan var sofandi í Lexus-bifreið sinni sem var lagt úti í vegkanti en Michael hafði gefið honum bifreiðina. Hann var skotinn og lík hans fannst nokkrum dögum síðar.

Green og Demery voru báðir dæmdir í lífstíðarfangelsi en þeir hafa alla tíð kennt hvorum öðrum um að hafa skotið Larry Jordan til bana.

Hvað hefði getað orðið?

Michael Jordan hefur ekki farið í grafgötur með að morðið á föður hans hafi átt þátt í því að hann lagði skónna á hilluna haustið 1993. Þegar hann hætti í körfubolta hafði hann og lið hans Chicago Bulls unnið þrjá meistaratitla í röð í NBA-deildinni. Brotthvarf Jordan varð til þess að liðið náði ekki að vinna meistaratitilinn næstu tvö keppnistímabil á eftir. Eftir að Jordan ákvað að snúa aftur til leiks unnu Chicago Bulls titilinn önnur þrjú ár í röð.

Hefði faðir hans ekki verið myrtur er aldrei að vita nema að Jordan hefði ekki tekið sér þetta eins og hálf árs langa hlé og Bulls þá mögulega unnið þessa tvo meistaratitla sem liðið missti af á meðan Jordan var í burtu.