Vararíkisstjórinn Mark Robinson er að bjóða sig fram til embættis ríkisstjóra í Norður-Karólínu. Hann er repúblikani og mikill stuðningsmaður Trump. Það vakti gífurlega athygli í september þegar CNN birti frétt þar sem frambjóðandinn var tengdur við gróf ummæli sem voru látin falla á klámsíðu fyrir þó nokkrum árum, eða áður en Robinson sneri sér að stjórnmálum.
Téð ummæli voru fólki í sér mikla kvenfyrirlitningu og eins kynþáttafordóma, og það þrátt fyrir að Robinson sé sjálfur svartur. Þar sagði hann meðal annars að það væri verr og miður að KuKuxKlan-hópurinn tekur ekki inn svarta meðlimi, en hann skilgreindi sig sem svartan nasista.
Varð fréttaflutningur til þess að margir nafntogaðir repúblikanar ákváðu að láta af stuðningi við Robinson, þar með talið Trump. Robinson segir að CNN hafi ákveðið að birta fréttina án þess að skeyta nokkru um að persónuupplýsingar Robinson, þar með talið nafn hans, lykilorð, netfang og fæðingardagur, hefði verið hluti af stórum gagnalekum. Virðist frambjóðandinn þar með gefa til kynna að óvíst sé að ummælin á klámsíðunni séu raunverulega hans. CNN hafði tengt hann við ummælin með því að rekja saman meðal annar netfang og annað slíkt.
Robinson kallar fréttaflutninginn „hátækni hýðingu á frambjóðanda sem hafi frá upphafi verið skotmark þeirra sem eru ósammála mér í stjórnmálum og vilja rústa framboði mínu“.
CNN hafði þó meira í höndunum heldur en bara netföng, notendanafn og slíkt til að tengja Robinson við ummælin. Sérfræðingar voru fengnir til að greina orðræðuna á klámsíðunni og bera saman við orðræðu Robinson á samfélagsmiðlum hans. Niðurstaðan var sú að ummælin kæmu líkast til frá sama manni.
Robinson hefur þó ákveðið að höfða meiðyrðamál og fer fram á marga milljarða í miskabætur. Er því haldið fram í stefnu að fréttaflutningi hafi ætlað að koma höggi á framboð hans en að um skipulagða aðför gegn orðspori hans hafi verið um að ræða.
