Nýlega kom til skotbardaga við höfuðstöðvar fyrirtækisins Wildberries í Moskvu. Fyrirtækið er nokkurs konar rússnesk útgáfa af Amazon. Hér var um uppgjör að ræða og féllu tveir í valinn í því. Málið hefur vakið mikla athygli í Rússlandi og þá kannski aðallega af því að þetta gerðist ansi nærri Kreml.

Lögreglan er enn að rannsaka málið en það er ekkert leyndarmál hverjir voru viðriðnir þetta og það er heldur ekki neitt stórt leyndarmál hver ástæða skotbardagans var.

Skotbardaginn var afleiðing af langvarandi og lítt leynilegum átökum á milli hjónanna Tatjana Kim og Vladislav Bakalchuk um yfirráð yfir Wildberries sem er mjög svo ábatasamt fyrirtæki. Í tengslum við deiluna höfðu þau bæði ráðið handrukkara frá norðurhluta Kákasus til að gæta hagsmuna sinna.

Inni í höfuðstöðvunum stóðu þeir sem Tatjana hafði ráðið til starfa, flestir frá Dagestan og Ingúsetíu. Að þeim sóttu liðsmenn Vladislav en þeir eru flestir frá Téténíu.

Vel vopnaðir glæpamenn frá norðurhluta Kákasus hafa lengi tekist á við slavnesk glæpagengi um yfirráðin yfir svarta markaðnum í Moskvu og verndarpeninga frá fyrirtækjum í borginni. En það heyrir samt til algjörra undantekninga að til skotbardaga komi í einu af fínustu hverfum borgarinnar.

Það kemur sérfræðingum í málefnum rússneska réttarvörslukerfisins ekki á óvart að enginn af meintum höfuðpaurum málsins skuli vera í gæsluvarðhaldi og muni væntanlega ekki verða handteknir.

Ofbeldismennirnir frá Téténíu eru að sögn Novaya Gazeta Europa með höfuðstöðvar á lúxushóteli í nokkurra mínútna akstursfjarlægð frá Kreml. Þeir hafa að sögn „boðið upp á margvíslega þjónustu“ árum saman. „Líkamsárásir (mannrán, árásir, ofbeldi og morðhótanir) voru alltaf meðal mest sannfærandi röksemdanna á þessu hóteli,“ segir miðillinn.

Það eru ekki neinar nýjar fréttir að ágreiningur í rússnesku viðskiptalífi sé leystur með vopnavaldi. Það er einnig erfitt að sjá mörkin þar sem löglegum viðskiptum lýkur og skipulagðir glæpir hefjast.

Átökin um Wildberries minnir óþægilega á tíunda áratuginn þegar leigumorð og blóðug uppgjör um eignarrétt yfir verksmiðjum og fyrirtækjum voru næstum daglegt brauð. Slíkum málum hefur farið fjölgandi á síðustu árum og rússneskir fjölmiðlar hafa flutt fréttir af fjölgun ofbeldismála þar sem skotvopn koma við sögu. Þetta er til þess fallið að auka ótta almennings við glæpi og lögleysu.

Í mörgum þessara mála er bein tenging við stríðið í Úkraínu. Rússneskir fjölmiðlar hafa skýrt frá mörgum hrottalegum afbrotum þar sem vopn frá átakasvæðum eru notuð eða þar sem gerendurnir hafa barist í stríðinu. Í mörgum málanna er um menn að ræða, sem höfðu áður hlotið dóma, sem voru náðaðir eftir að hafa barist í Úkraínu.