Það gerðist í september 2023 þegar lögreglan fór heim til Virginia eftir að læknir foreldra þeirra hafði haft samband við lögregluna og lýst yfir áhyggjum sínum af að hafa ekkert heyrt frá foreldrunum í langan tíma.
The Guardian segir að lögreglan hafi fundið lík föður Virginia, John McCullough, í heimatilbúinni gröf sem samanstóð af steypuklumpum. Lík móður hennar, Lois McCullough, fannst í svefnpoka í skáp í svefnherbergi hennar.
Virginia eitraði fyrir föður sínum með hans eigin lyfjum en móður sinni banaði hún með hamri og eldhúshníf.
Ekki er vitað af hverju hún myrti þau en hún sagði lögreglunni að hún hefði ekki átt neinna annarra kosta völ. Hún játaði sök og sagði lögreglunni að hún hafi vitað að það myndi komast upp um hana á einhverjum tímapunkti.
Hún var dæmd í ævilangt fangelsi í síðustu viku en getur sótt um reynslulausn eftir 36 ár.
Rob Kirby, yfirlögregluþjónn, sagði fyrir dómi að morðin hafi verið „framin með köldu blóði“ af konu sem sé „snjall lygari“ sem hafi logið um nær allt varðandi líf sitt.
Bréf frá systkinum Virgina var lesið upp fyrir dómi en í því skrifuðu þau að morðin séu „lifandi martröð“ fyrir þau. Ekki liggur fyrir af hverju þau grunaði ekki að foreldrar þeirra væru ekki lengur á lífi.
Virgina lifði á lífeyrisgreiðslum foreldra sinna og fékk að minnsta kosti sem svarar til um 25 milljónum íslenskra króna greiddar á þessum fjórum árum.
Gögn sýna að hún eyddi sem nemur um átta milljónum í veðmál á netinu á þessum tíma en ekki er að sjá að hún hafi lifað neinu lúxuslífi.
