Óhætt er að segja að óperan „Sancta“, eftir hina austurrísku Florentina Holzinger, hafi haft mikil áhrif á gesti óperunnar í Stuttgart í Þýskalandi þegar hún var sýnd þar nýlega. Átján gestir þurftu á aðstoð að halda vegna gríðarlegrar ógleði sem sótti á þá. Í óperunni eru gerð göt á líkama fólks, það stundar kynlíf á sviðinu og mikið magn af alvöru blóði og gerviblóði flæðir um.

Þetta er greinilega ekki eitthvað sem allir þola ef miða má við frétt The Guardian sem segir að verkið hafi verið sýnt tvisvar í óperunni og hafi samtals átján sýningargestir þurft á aðstoð að halda, þar af þurftu þrír læknisaðstoð.

Verk Holzinger eru þekkt fyrir að dansa á mörkum dansverka og djarfra sýninga. Aðeins konur koma fram í verkum hennar og eru þær venjulega allsnaktar eða hálfnaktar á sviðinu. Í fyrri verkum hennar hafa leikararnir meðal annars stundað sverðagleypingar, húðflúr, sjálfsfróun og málað með blóði og hægðum.

Holzinger ræddi við blaðamann the Guardian fyrr á árinu og sagði þá að í hennar augum sé góð danstækni ekki bara að geta dansað fullkomlega, heldur einnig að geta kastað af sér vatni eftir pöntun.