Það er auðvelt að sjá tunglið fyrir sér sem lofthjúpslausan stóran stein á braut um jörðina. En þrátt fyrir að þar sé ekki loft sem við getum andað að okkur, þá er þar þunnur lofthjúpur.

Vísindamenn hafa lengi velt vöngum yfir þessum mjög svo viðkvæma lofthjúp og hafa leitað að ástæðum þess að tunglinu tekst að halda honum. En ný rannsókn varpar ljósi á þetta.

Live Science segir að samkvæmt niðurstöðum rannsóknarinnar þá viðhaldist og endurnýist lofthjúpurinn vegna stanslausra árekstra loftsteina við tunglið.

Vísindamennirnir telja að lofthjúpurinn viðhaldist aðallega vegna þessa og hafi gert í milljarða ára. Ástæðan er að þegar loftsteinn skellur á tunglinu, þyrlast jarðvegur upp og gufar efni þá upp og fer annað hvort út í geim eða dreifist yfir yfirborðið. Þannig endurnýjast lofthjúpurinn.

Nicole Nie, aðalhöfundur rannsóknarinnar, sagði í tilkynningu að rannsóknin hafi leitt í ljós að aðalferlið, sem myndar lofthjúpinn á tunglinu, sé árekstrar þess við loftsteina. Á þeim 4,5 milljörðum ára, sem tunglið hafi verið til, hafi loftsteinar stanslaust barið á því.