Málið hefur vakið gríðarlegt umtal í Frakklandi en Dominique er sakaður um að hafa byrlað konu sinni ólyfjan og boðið svo ókunnugum körlum að nauðga henni meðan hún var rænulaus.
Gisele hefur sýnt mikið hugrekki og fylgst með öllum réttarhöldunum þar sem hinir ákærðu hafa ýmist lýst sig seka eða saklausa. Í gær fékk Gisele þó nóg þegar hún hlýddi á vitnisburð manns að nafni Vincent C. sem er ákærður í málinu.
Vincent þessi starfar sem smiður og í umfjöllun Le Monde kemur fram að hann sé „drykkfelldur grasreykingamaður sem fær sér kókaín endrum og eins“. Þá hafi hann hlotið dóm vegna heimilisofbeldis. Hann neitaði að hafa nauðgað Gisele en viðurkenndi þó að hafa stundað með henni kynlíf, enda talið að atburðarásin öll væri með hennar samþykki.
Hann lýsti því fyrir dómi að hann hefði farið inn á hina alræmdu vefsíðu, Coco.fr, þar sem hann komst í kynni við Dominique. „Þetta gekk mjög hratt fyrir sig. Ég skráði mig inn og hálftíma síðar var ég búinn að bóka heimsókn.“
Gisele virtist vera misboðið þegar Vincent lýsti því yfir að úrvalið á vef Coco hefði ekki verið upp á marga fiska og að heimsækja síðuna væri ekki beint eins og að fara í súpermarkað.
Þrátt fyrir það heimsótti hann heimili Dominique og Gisele í tvígang, fyrst í október 2019 og svo aftur í janúar 2020.
Þegar hann var spurður að því hvort hann hefði aldrei sett spurningarmerki við hvað Dominique væri að gera sagðist Vincent einfaldlega hafa verið að leita sér að bólfélaga og í slíkum aðstæðum hefði hann ekki mikla rökhugsun. Sagðist hann hafa talið að boð Dominique væri með samþykki eiginkonu hans.
Réttarhöldin munu standa yfir næstu vikurnar, en búist við því að þeim ljúki í desember. Þykir líklegt að niðurstaða komi einhverjum vikum eftir það, hugsanlega í byrjun nýs árs.
