Ungt barn í Ontario-héraði í Kanada lést á dögunum eftir að hafa smitast af hundaæði frá leðurblöku sem komst inn á heimilið. Þetta er fyrsta tilfelli hundaæðis í Ontario frá árinu 1967.

Breska ríkisútvarpið, BBC, skýrir frá þessu. Barnið var búsett í borginni Sudbury í suðausturhluta Kanada.

Malcolm Lock, læknir á svæðinu, segir við BBC að fjölskyldan hafi vaknað einn dag í byrjun september við leðurblöku í húsinu.

Foreldrar barnsins sáu engin merki þess að leðurblakan hefði bitið eða klórað barnið og töldu þar af leiðandi ekki þörf á því að fara á sjúkrahús til að fá sprautu gegn hundaæði.

Barnið fór að sýna einkenni veikinda ekki löngu síðar og þegar farið var með það á sjúkrahús kom í ljós að um hundaæði væri að ræða. Ekki reyndist unnt að bjarga lífi þess þar sem einkenni voru þegar komin fram. Ekki hefur verið greint frá nákvæmum aldri barnsins.

Hundaæði er sjaldgæfur en ólæknandi veirusjúkdómur sem getur lagst á öll spendýr. Á Vísindavefnum kemur fram að sjúkdómurinn lýsi sér með krampaflogum, einkum í vöðvum sem stjórna öndun og kyngingu. „Það einkennilega er að kramparnir koma fram eða versna mikið við tilraunir til að drekka vatn, við að sjá vatn, heyra vatnshljóð eða heyra talað um vatn,“ segir í greininni og bætt við að af þessum ástæðum hafi sjúkdómurinn stundum verið kallaður vatnsfælni.

„Nafnið hundaæði stafar af því að sjúkdómurinn leggst oft á hunda og gerir þá hrædda, órólega, slefandi og árásargjarna. Hægt er að bólusetja við hundaæði en þeir sem veikjast af sjúkdómnum deyja flestir eftir um viku veikindi með miklum þjáningum,“ segir á Vísindavefnum.

Sjúkdómurinn er sem betur fer sjaldgæfur í mönnum en frá árinu 1928 hafa 28 tilfelli hundaæðis komið upp í Kanada. Í öllum tilvikum hafa sjúklingarnir látist.