Vitað er að Keltar, sumir þeirra voru kallaðir Gallar af Rómverjum, lögðu sunnanvert Pólland undir sig um 400 fyrir Krist. En ný uppgötvun bendir til að þeir hafi einnig verið til staðar í norðurhluta landsins.

Þetta byggja fornleifafræðingar á nýjum fundi pólskra fornleifafræðinga sem fundu keltneskan hjálm, sem er 2.300 ára, og aðra muni í norðurhluta landsins.

Live Science hefur eftir Bartlomiej Kaczynski, fornleifafræðingi hjá fornmunasafninu í Varsjá, að líklega hafi Keltar sest að í norðurhluta landsins til að tryggja sér yfirráð yfir verðmætu rafi.

Hann sagði að hjálmurinn og aðrir keltneskir munir, sem fundust, séu sönnun þess að Keltar hafi verið til staðar í norðurhluta landsins. Hann benti einnig á að aldrei fyrr hafi fundist ummerki um Kelta svo norðarlega í Evrópu.

Hjálmurinn er úr þunnu bronsi og með leðri og í keltneskum „Berru“ stíl. Kazcynski sagði einnig að hjálmurinn hafi líklega gegnt hernaðarlegu hlutverki frekar en að vera stöðutákn.