Myndin sem um ræðir var tekin af hinum 77 ára Trump þegar hann yfirgaf íbúð sína á Manhattan til að vera viðstaddur dómsmál í ærumeiðingarmáli sem höfðað hefur verið gegn honum.
Það sem vakti athygli voru rauðir blettir, sem líktust einna helst blóði, á hægri hönd Trumps.
Netverjar eiga það til að velta sér upp úr ýmsu og komu fram getgátur um að Trump hefði mögulega slasað sig eða væri haldinn einhvers konar sjúkdómi.
Jonathan reiner, prófessor í læknisfræði við George Washington School of Medicine and Health Sciences, segir að Trump hafi sennilega meitt sig lítillega.
„Það er til dæmis ekki óalgengt að 77 ára gamalt fólk detti. En kosningaliðið hans ætti að útskýra málið,“ sagði hann á samfélagsmiðlinum X.
Joshua Zeichner, aðstoðarprófessor í húðlækningum við Mount Sinai-sjúkrahúsið, segir að Trump gæti verið með útbrot og ýmsar ástæður gætu legið að baki. Mögulega væri hann að glíma við handþurrk og þá gæti hann hafa fengið blöðrur á hendurnar eftir að hafa spilað golf.
