Sonurinn heitir Loki Skywalker Mowbray. Miðnafnið er auðvitað sótt í Stjörnustríðssagnabálkinn og töldu yfirvöld að það brjóti gegn höfundarrétti að skrá Skywalker nafnið í vegabréf því Disney eigi réttinn á því.
Foreldrar hans höfðu pantað ferð til Dómíkanska lýðveldisins í lok október en þetta átti að vera fyrsta frí fjölskyldunnar síðan 2014 en vegna vinnu Christian Mowbray, fjölskylduföðurins, hjá breska hernum hefur hún átt erfitt með að finna tíma til að fara í frí saman auk þess sem eiginkona hans glímir við alvarlega áfallastreituröskun.
Suffolk News hefur eftir Mowbray að hann skilji vel afstöðu yfirvalda en telji að þau verði að átta sig á að nafngiftir séu í stöðugri þróun. „Ég skil þetta ef fullorðnir breyta nafninu sínu en það er annað með barn sem hefur borið nafnið frá fæðingu,“ sagði hann.
Hann sagði að málið hafi valdið fjölskyldunni „miklu álagi“ því hún hafi séð fram á að þurfa hugsanlega að hætta við fríið og ekki bætti úr skák ef breyta þyrfti nafni sonarins.
Loki fæddist 4. maí, sem er haldinn hátíðlegur sem Stjörnustríðsdagur, og fannst foreldrum hans því við hæfi að miðnafn hans tengdist sagnabálkinum. Stjörnustríð hefur verið stór hluti af lífi Mowbray síðan hann var barn.
Á föstudaginn birti þó til hjá fjölskyldunni þegar innanríkisráðuneytið tilkynnti henni að það muni gefa út vegabréf fyrir Loka.
