Í norrænni goðafræði er meðal annars að finna frásögn um vetur sem stóð yfir í þrjú ár. Ekkert sumar kom í þessi þrjú ár og hefur þessi langi vetur verið kallaður fimbulvetur.

Niðurstaða nýrrar rannsóknar frá danska þjóðminjasafninu bendir til að þetta sé hugsanlega ekki bara goðsögn eða mýta, að þetta hafi í raun og veru gerst á sjöttu öld.

Vísindamenn rannsökuðu 104 eikartré frá sjöttu öld og sáu að þau sýna öll merki um óvenjulegan vöxt á árunum 539 til 541.

„Við sjáum á árhringjunum í trjánum að það hafa verið miklir loftslagsatburðir árið 539 en þá urðu vaxtarskilyrðin mjög slæm því það kólnaði svo mikið,“ hefur Jótlandspósturinn eftir Morten Fischer Mortensen, aðalhöfundi rannsóknarinnar.

Á þessum tíma var stór hluti jarðarinnar hulinn ösku og brennisteinssýru vegna fjölda eldgosa í Mið-Ameríku og hér á landi.

Skriflegar heimildir frá Miðjarðarhafssvæðinu og Kína segja frá óvenjulega daufri sól og korni sem aldrei náði þroska á ökrum.

Nú hafa vísindamenn í fyrsta sinn sýnt fram á að þessara áhrifa hafi gætt í Danmörku. „Við vitum að stór hluti jarðarinnar fann fyrir áhrifum þessara atburða en við höfum aldrei getað sannað að þeirra hafi einnig gætt hér í Danmörku. Nú erum við í fyrsta sinn með áþreifanleg sönnunargögn fyrir að ástandið hafi verið slæmt hérna,“ sagði Mortensen.

Á þessum tíma var Danmörk bændasamfélag og því hafa þrjú löng ár með myrkri og kulda haft skelfilegar afleiðingar fyrir landið. Merki um áhrifin eru þekkt í Danmörku því svæði og þorp voru yfirgefin á þessum tíma og skógar teygðu úr sér og fóru að vaxa á ökrum. Mortensen sagði að líklega hafi margir ekki lifað þetta af.

Rannsóknin hefur verið birt í vísindaritinu Journal of Archaeological Science Reports.