Það var svo tæpum 70 árum síðar, árið 2020, að frænka Luis, Alida Alequin, tók DNA-próf „að gamni sínu“ og renndi niðurstöðunum í gegnum gagnagrunn á netinu að hún komst að því að hún ætti mjög skyldan ættingja á austurströnd Bandaríkjanna. Voru líkindin 22% sem þykir býsna mikið og því ljóst að um væri að ræða náskyldan ættingja sem hún þekkti að vísu engin deili á.
Alida reyndi að komast í samband við manninn en án árangurs. Þau leituðu því annarra leiða og flettu í gegnum dagblöð frá árinu 1951 þar sem þau fundu mynd af Luis litla sem tekin var skömmu áður en hann hvarf. Alida leitaði svo til lögreglu og þá fóru hjólin að snúast fyrir alvöru. Komst fjölskyldan loksins í samband við Luis með aðstoð lögreglu og féllst hann á að gangast undir DNA-rannsókn í sumar.
Það var þá sem loksins var staðfest að þarna væri kominn fram Luis Armando Albino sem hvarf árið 1951.
New York Post fjallar um málið en í umfjölluninni kemur fram að lögregla hafi meðal annars á sínum tíma rætt við við eldri bróður Luis, Roger, sem varð vitni að því þegar litla bróður hans var rænt. Umfangsmikil leit var gerð en hún bar engan árangur. Í 54 ár þurfti móðir Luis litla að lifa við óvissu um hvað varð um drenginn, en hún lést árið 2005. Roger hitti svo litla bróður sinn í sumar, skömmu áður en hann lést.
Ekki hefur verið gefið upp hvaða fólk þetta var sem rændi Luis á sínum tíma, en hann virðist þó hafa átt ágætt og nokkuð viðburðaríkt líf. Hann varð slökkviliðsmaður og var í bandaríska hernum þegar Víetnamstríðið stóð sem hæst. Þá eignaðist hann sín eigin börn og barnabörn.
