Hraði DART var 24.000 km/klst við áreksturinn en markmiðið með honum var að breyta stefnu loftsteinsins. Þetta var liður í rannsóknum NASA á hvernig sé hægt að breyta braut loftsteina sem gætu hugsanlega lent í árekstri við jörðina.
En sú hliðarverkun varð af árekstrinum að milljónir örsmárra stykkja úr loftsteininum þjóta nú um geiminn og stefna hugsanlega á jörðina.
Þetta er niðurstaða nýrrar rannsóknar að sögn Live Science.
Þessi stykki gætu komið inn í gufuhvolf jarðarinnar á næstu tíu árum. En það er engin ástæða til að hafa áhyggjur að sögn Eloy Pena-Asensio, aðalhöfundar rannsóknarinnar, sem segir að engin hætta fylgi þessu og það sem við munum upplifa séu fallegar lýsandi rendur á himninum þegar stykkin brenna upp.
Minnstu stykkin munu byrja að koma inn í gufuhvolfið eftir um 10 ár en þau stóru ekki fyrr en eftir um 30 ár því þau fara hægar yfir.
