Ímyndaðu þér að þú sért á gangi eftir strönd og að þar finnir þú 200 milljóna ára gömul fótspor eftir risaeðlu. Þetta hljómar eiginlega eins og söguþráður í barnabók en fyrir hina 10 ára Tegan þá er þetta raunveruleikinn því hún fann slík spor á strönd í Wales.

Metro segir að Tegan hafi farið með Claire móður sinni á ströndina til að leita að steingervingum. Það er óhætt að segja að þær hafi veðjað hárrétt á hvar á ströndinni væri vænlegt til árangurs að leita að steingervingum.

Á svæðinu, sem þær völdu, koma fótspor eða bein í ljós á um fimm ára fresti. Til dæmis kom heil beinagrind 201 milljón ára gamallar dracoraptor risaeðlu í ljós þar 2014. Þetta var kjötæta, náskyld T-rex.

Tegan fann heil fimm fótspor og voru um 75 cm á milli þeirra. Þetta bendir til að þarna hafi töluvert stór risaðela gengið um.

„Við fórum bara þangað til að sjá hvort við myndum finna eitthvað, við áttum ekki von á að finna eitthvað. Við fundum þessar stóru holur sem líktust risaeðlufótsporum. Mamma tók myndir, sendi þær til safnsins og þetta reyndust vera fótspor eftir hálslanga risaeðlu,“ sagði Tegan.

Enn á eftir að staðfesta hvaða risaeðlutegund gekk þarna um og skildi fótsporin eftir sig en talið er að það hafi verið cameloti sem var risavaxinn jurtaæta.