Málið varðar 17 ára dreng, Jordan DeMay, sem svipti sig lífi þann 25. mars 2022. Jordan fannst látinn á heimili sínu með skotsár og leiddi rannsókn á dauða hans í ljós að hann hefði verið fórnarlamb svokallaðrar sæmdarkúgunar.
Þolendur í slíkum málum eru gjarnan ungir karlar sem eru ginntir til að senda af sér kynferðislegar myndir í gegnum samfélagsmiðla. Viðtakandinn reynist síðan ekki vera sá sem hann segist vera og krefst peninga, ella verði myndunum dreift áfram til annarra.
Það er einmitt það sem gerðist í máli Jordans DeMay. Voru bræðurnir, Samuel og Samson, hluti af glæpahring sem stundaði þessa iðju og tókst þeim að leiða unga piltinn í gildru. Eftir að hann hafði sent af sér kynferðislegar myndir kröfðust þeir þess að hann myndi greiða þeim 1.000 dollara. Þegar Jordan sagði að hann ætti ekki fyrir því sagðist hann ætla að svipta sig lífi. „Gott. Gerðu það fljótt því annars læt ég þig gera það. Ég sver það,“ svöruðu bræðurnir.
Lögregla tók málið strax alvarlega og leiddi rannsókn í ljós að uppruna skeytanna mætti rekja til Lagos í Nígeríu. Lögregluyfirvöld í Nígeríu aðstoðuðu bandarísk yfirvöld í málinu og voru Samuel og Samson handteknir í janúar 2023. Í fyrrasumar féllust yfirvöld í Nígeríu á að þeir yrðu framseldir til Bandaríkjanna og var dómur í máli þeirra kveðinn upp í vikunni.
Rannsókn lögreglu leiddi í ljós að bræðurnir hefðu reynt fjárkúgun gegn alls 38 bandarískum ríkisborgurum, þar af voru 13 undir lögaldri. Alls voru fórnarlömbin yfir hundrað í mörgum löndum. Þriðji maðurinn liggur einnig undir grun í málinu en framsalsbeiðni hans frá Nígeríu er enn til meðferðar hjá dómstólum þar í landi.
