Wilson sýndi engin viðbrögð þegar dómari kvað upp dóminn yfir honum, en ekki liggur fyrir hvenær hann verður tekinn af lífi. Bað lögfræðingur hans eftir að dómur var kveðinn upp að hann yrði færður á dauðadeild svo fljótt sem kostur er.
Wilson var dæmdur fyrir að myrða tvær konur, hina 35 ára gömlu Kristine Melton og 43 ára gömlu Diane Ruiz.
Hann hitti Kristine fyrst á bar síðdegis 6. október 2019 og fór með henni heim. Þar þrengdi hann að öndunarvegi hennar með þeim afleiðingum að hún lést. Daginn eftir tókst honum að lokka Ruiz upp í bifreið sína þar sem hennar biðu sömu örlög og Kristine. Sögðu saksóknarar að hann hafi ákveðið að drepa til þess eins að drepa þennan dag.
Wilson er auðþekkjanlegur á húðflúrum sem hann er með á andlitinu, meðal annars hakakrossinn.
Á blaðamannafundi eftir að dómur var kveðinn upp í gær var saksóknarinn Amira Fox ómyrk í máli.
„Ég hef sinnt þessu starfi í 34 ár og ég verð að segja að ég haf aldrei séð neinn jafn illan og Wade Wilson,“ sagði hún. Aðstandendur Kristine og Diane sögðu að þeir ættu eftir að sjá Wade einu sinni enn, það er þegar dauðadómnum verður framfylgt.