Flug MH370 tók á loft frá Kuala Lumpur í Malasíu þann 8. mars 2014 og var förinni heitið til Peking í Kína. Vélin var af gerðinni Boeing 777 og um borð voru 239 manns. Ekki löngu eftir flugtak var stefnu vélarinnar breytt og henni flogið til suðurs og hún datt út af ratsjám. Hún skilaði sé aldrei til Peking og hvarf hennar er enn óupplýst. Þetta er ein stærsta ráðgáta flugsögunnar og ótal samsæriskenningar hafa verið settar fram um hvað gerðist.
Brak úr vélinni hefur fundist en ekki eitt einasta lík og svarti kassinn svokallaði hefur heldur ekki fundist enda er ekki vitað hvar flakið er, nema Lyne hafi rétt fyrir sér.
Lyne skrifaði á Linkedin að það hafi verið bráðsnjall flugmaður vélarinnar sem hafi séð til þess að hún hvarf algjörlega í Suður-Indlandshaf. Það hafi þó komið upp um staðsetningu vélarinnar að hægri vængur hennar hafi farið í gegnum öldu og að gervihnattarsamskipti hafi verið numin af Inmarsat.
Hann segir að vélinni hafi verið vísvitandi stýrt niður í hafið á svokölluðu Broken Ridge svæði sem er mjög hæðótt og hættulegt. Þar séu brattar hlíðar neðansjávar og gríðarlega stórir neðansjávarhryggir og djúpar holur. Svæðið sé þakið jarðlögum og sé því hinn fullkomni „felustaður“. Hann segir að vélin sé þarna á um 6.000 metra dýpi.
Hann segir að þetta styðji kenninguna um að flugmaður vélarinnar, Zaharie Ahmad Shah, hafi vísvitandi stýrt henni niður í sjóinn.
Fyrri kenningar hafa sumar gengið út á að flugmaðurinn hafi borið ábyrgð á hvarfi vélarinnar og hafi ætlun hans verið að taka farþegana og áhöfnina með sér í dauðann því hann hafi ætlað að svipta sig lífi vegna skilnaðar hans og eiginkonunnar.
