Svo langt hefur þetta gengið að margir segja þetta vera algjöra plágu. Þessi plága er með fjögur hjól og handfang og var þar til nýlega aðallega notuð undir fatnað og annað sem þarf að taka með í ferðalag. En nú er hún komin með rafmótor.
Áður fyrr drógu farþegar hana á eftir sér þegar þeir gengu eftir löngum göngum flugvalla en nú sitja sumir ofan á henni og nota eins og lítinn bíl. Þetta er rafknúin ferðataska.
Þetta hljómar auðvitað eins og það sé mjög praktískt að sitja á ferðatöskunni sinni og láta hana flytja sig áfram. En þetta veldur vandræðum á flugvöllum og í umferðinni.
Á japönskum flugvöllum hefur starfsfólk fengið nóg af þessu og nú eru farþegar hvattir til að nota ferðatöskurnar ekki á þennan hátt á flugvallarsvæðinu. Á Haneda flugvellinum í Tókýó hefur enn stærra skref verið tekið og rafknúnar ferðatöskur verið bannaðar með öllu.
K-poppstjörnur, sem njóta mikilla vinsælda í Asíu, hafa verið duglegar við að nota ferðatöskur á þennan hátt og það hefur átt sinn þátt í að gera þær vinsælar. Stjörnurnar taka myndir af sér akandi um á ferðatöskunum á flugvöllum og einnig á sviðinu þegar þær koma fram á tónleikum.
Hámarkshraði flestra er 13 km/klst og þær geta borið allt að 100 kg. Þær líkjast venjulegum ferðatöskum en rafmótorinn gerir þær öðruvísi hvað varðar notkun. Það gerir handfangið, sem er venjulega notað til að draga ferðatöskur, líka því það er ekki eiginlegt handfang heldur stýri. Í því er takki til að stýra hraðanum.
Travel Weekly segir að Changi flugvöllurinn í Singapúr hafi verið meðal fyrstu flugvallanna til að banna ferðatöskur af þessu tagi og í febrúar fylgdi Haneda flugvöllurinn í kjölfarið.
