Það er ekki óalgengt að fólk vakni klukkan 6 til að hlaupa niður í sundlaugargarðinn eða niður á strönd til að setja handklæði á sólbekk eða til að taka hann frá. Síðan fer fólkið aftur upp á hótelherbergið sitt og lætur jafnvel ekki sjá sig á sólbekknum fyrr en eftir marga klukkutíma.
Express segir að þetta vandamál hafi farið vaxandi á síðustu árum og segja yfirvöld að sífellt fleiri kvartanir berist frá heimafólki um framferði ferðamanna. Svo slæmt var ástandið í sumar að lögreglan sá sig tilneydda til að grípa inn í.
Í mörgum strandbæjum er nú bannað að setja sólhlíf upp eða taka sólbekk frá fyrir klukkan 8 eða 9. Reglurnar ná bæði til ferðamanna og heimamanna. Ef þær eru ekki virtar, getur lögreglan beitt sektum.
Áður var sektin fyrir að taka sólstól frá á ströndinni og snúa síðan ekki aftur í hann fyrr en mörgum klukkustundum síðar 250 evrur. En nú hefur hámarkssektin verið hækkuð í 750 evrur að sögn Dagbladet.
Lögreglan getur beitt sektum ef fólk notar sólbekkina sína ekki í þrjár klukkustundir og gildir þá einu á hvaða tíma dags það er gert.