Jessie var lögð inn á Mercy San Juan-sjúkrahúsið í Sacramento í Kaliforníu þann 6. apríl í fyrra. Þegar aðstandendur hennar ætluðu að sækja hana á sjúkrahúsið fengu þeir upplýsingar um að hún hefði sjálf ákveðið að yfirgefa spítalann. Ekkert spurðist til hennar í kjölfarið og voru aðstandendur hennar furðu lostnir yfir hvarfinu og áhyggjufullir yfir því að hún væri einhvers staðar á vergangi.
Það var ekki fyrr en ári síðar að alvöru skellurinn kom. Þá kom á daginn að Jessie hafði dáið á þessu sama sjúkrahúsi þann 8. apríl, tveimur dögum eftir að hún var lögð inn, og voru aðstandendur hennar ekki upplýstir um andlátið. Hafa þeir nú höfðað mál gegn sjúkrahúsinu þar sem þeir krefjast bóta.
Móðir Jessie, Ginger Congi, segir við fjölmiðla að hún hafi fengið símtal frá dóttur sinni þann 8. apríl í fyrra þess efnis að hún væri á leið heim af sjúkrahúsinu og vantaði far. Svo var eins og Jessie hefði bara horfið. Þann 12. apríl síðastliðinn fékk fjölskyldan það staðfest að Jessie hefði verið látin allan þennan tíma og hún hefði dáið um tveimur tímum eftir að hún hringdi í móður sína.
Forsvarsmenn sjúkrahússins hafa ekki tjáð sig um málið en á dánarvottorði sem grafið var upp kom fram að Jessie hefði fengið hjartaáfall. Aðstandendur hennar segja að ekki sé unnt að staðfesta það enda líkið of illa farið til að hægt sé að framkvæma sjálfstæða krufningu.
Fjölskyldan fer fram á 5 milljónir Bandaríkjadala, tæpar 700 milljónir króna, í bætur.