Hann segir að einföld morgunrútína af þessu tagi sé ekki eingöngu heilbrigður lífsstíll heldur geti þetta einnig haft þyngdartap í för með sér og hjálpi til við að brenna fitu hraðar.
Daglegur göngutúr hjálpar til við að brenna hitaeiningum en morgunbirtan er afgerandi þegar kemur að því að halda svefnrytmanum í jafnvægi.
„Fyrir utan að vekja þig, þá hjálpar náttúruleg birta til við að núllstilla þitt innra úr sem stýrir svengd, skapi, líkamshita og öðrum mikilvægum þáttum líkamsstarfseminnar,“ segir Mosley að sögn Express.
„Birtustigið utanhúss er að minnsta kosti 10 sinnum meira en innandyra. Þegar skynjararnir bak við augun nema þessa birtu, senda þeir skilaboð til þess svæðis heilans sem stöðvar framleiðslu melatóníns. Melatónín er kallað „hormón myrkursins“ því hærra gildi þess á kvöldin hjálpar þér að sofna. Rannsóknir sýna sterk tengsl á milli lélegs svefns og þyngdaraukningar. Það er því afgerandi að viðhalda góðum svefnrytma til að geta lést,“ sagði hann einnig.
Til að ná hámarksárangri mælir Mosley með að minnsta kosti 30 mínútna göngutúr á hverjum morgni. Hann segir að styttri göngutúr geti einnig haft jákvæð áhrif fyrir heilsufarið. Fólki eigi því ekki að finnast það neytt til að ganga í hálftíma ef það hefur ekki tíma eða orku í það.
Hann bendir einnig á að göngutúrinn hafi önnur áhrif en að koma fólki í snertingu við mikla birtu. Hann styrki vöðva og bein og dragi úr lið- og vöðvaverkjum, brenni hitaeiningum og auki orku.