Dauðalisti með 28 nöfnum er í dreifingu á samfélagsmiðlum í Svíþjóð. Við hvert nafn er búið að setja upphæð sem mun vera í boði fyrir að myrða viðkomandi. Hlaupa upphæðirnar á frá 200.000 sænskum krónum og upp í eina milljón.

Aftonbladet skýrir frá þessu en blaðamenn blaðsins fundu listann á samfélagsmiðlum og það hafa blaðamenn fleiri miðla einnig gert.

Nöfnin 28 tengjast átökum glæpagengja í Södertälje en þar takast glæpagengin „Ronnafalangen“ og „Saltskogfalangen“ á. Lögreglan segir að dauðalistinn tengist meðlimum í síðar nefnda glæpagenginu.

Talsmaður lögreglunnar staðfesti við Aftonbladet að hún viti af listanum.

Ekki liggur fyrir hvort listinn er ósvikinn en lögreglan hefur ekki viljað segja neitt um það.

Södertälje, sem er nærri Stokkhólmi, hefur verið vettvangur blóðugra átaka glæpagengja áður en það var 2022 þegar skotárásir og sprengjutilræði gengu á víxl á milli gengjanna.