Stríðsherrann Ramzan Kadyrov, leiðtogi Téténíu, hefur boðið auðkýfingnum Elon Musk í heimsókn til Rússlands. Þetta gerði Kadyrov eftir að hann var myndaður við að keyra Cybertrukk frá fyrirtæki Musk, Teslu, en Kadyrov hafði bætt vélbyssu við trukkinn.

Kadyrov sagði cybertrukkinn óumdeilanlega bestu bifreið í heimi. „Ég kolféll fyrir honum,“ sagði stríðsherrann á Telegram. Hann lofaði því að gefa rússneska hernum bílinn svo hægt væri að nota hann í innrásinni í Úkraínu. „Þeir kalla trukkinn ekki skepnu að ástæðulausu. Ég er viss um að þessi skepna mun koma sér vel fyrir strákana okkar“

Kadyrov segir að Musk hafi sent sér bifreiðina, en sú fullyrðing hefur ekki fengist staðfest, hvorki hjá Teslu né Musk. Hún hefur þó að sama bragði ekki verið hrakin. Kadyrov sagðist vona að Musk kæmi í heimsókn til Téténíu og líklega muni rússneska utanríkisráðuneytið ekki hindra auðkýfinginn í þeirra ferð. Kadyrov bætti við í skilaboðum sínum til Musk: „Og að sjálfsögðu erum við að bíða eftir nýjum þróunarverkefnum sem geta hjálpað okkur að ljúka þessum sérstöku hernaðaraðgerðum okkar í Úkraínu.“