Breski milljarðamæringurinn Mike Lynch er í hópi þeirra sex sem enn er saknað eftir að snekkja sökk í óveðri við strendur Sikileyjar á Ítalíu í nótt. Alls voru 22 í snekkjunni þegar henni hvolfdi, flestir þeirra breskir ríkisborgarar.

Snekkjan sem um ræðir, Bayesian, er metin á um tvo milljarða króna og kostar vikuleiga á henni tæpar 30 milljónir króna.

Eiginkonu Mikes, Angela Bacares, var bjargað en þriggja Breta, tveggja Bandaríkjamanna og eins Kanadamanns er enn saknað.

Lynch er vellauðugur og komst hann til dæmis á lista Forbes yfir ríkustu menn heims. Hann seldi fyrirtækið Autonomy til Hewlett–Packard árið 2011 og fékk í sinn hlut 800 milljónir Bandaríkjadala en sú sala átti eftir að draga dilk á eftir sér.

Lynch var stefnt fyrir dóm vegna gruns um að hafa fegrað bókhald Autonomy og fór svo að hann var framseldur til Bandaríkjanna í fyrra. Fyrr í sumar var hann hins vegar sýknaður.