Eiginmaður Dee, Dale Warner, hefur lengi verið grunaður um aðild að hvarfinu en hann hefur staðfastlega neitað sök. Þó að ekkert lík hefði fundist var hann ákærður fyrir morð í fyrra.
Ríkislögreglan í Michigan tilkynnti á blaðamannafundi í gær að líkamsleifar hefðu fundist í garðinum við heimili Dale í Lenawee-sýslu. Ekki er búið að bera kennsl á líkamsleifarnar og mun DNA-rannsókn taka einhvern tíma áður en það fæst staðfest um hvern ræðir.
Það voru aðstandendur Dee, sem var 52 ára, sem tilkynntu um hvarf hennar vorið 2021. Ónafngreindir einstaklingar tengdir henni segja við bandaríska fjölmiðla að líkamsleifarnar hafi fundist í gömlum geymslutanki fyrir fljótandi ammóníak. Þykir það gefa ýmislegt til kynna.
Dale hefur setið í gæsluvarðhaldi síðustu mánuði og munu réttarhöld í máli hans hefjast þann 4. september næstkomandi.