Það fylgir ekki sögunni hvort það hafi verið regnbogi eða eitthvað annað sem kom fornleifafræðingum á spor fjársjóðs undir húsi einu í vesturhluta Tyrklands, þar sem gríski bærinn Notion var áður fyrr.

Þar fundu fornleifafræðingar fornan gríska gullfjársjóð að því er segir í fréttatilkynningu frá University of Michigan.

Mynd af krjúpandi bogamanni prýðir myntirnar en það er vel þekkt myndefni á persískum gullmyntum. Slíkar gullmyntir voru framleiddar fyrir 2.200 til 2.500 árum síðan, líklega á tíma Alexanders mikla þegar hann réðst inn í persíska ríkið. Talið er að þær hafi verið framleiddar í Sardis sem er um 100 km norðaustan við Notion.

Sardis var persískur bær sem Alexander hinn mikli lagði undir sig.

Fornleifafræðingar vita ekki af hverju fjársjóðurinn var grafinn þarna og segja í fréttatilkynningunni að það sé ákaflega sjaldgæft að finna svo verðmætan fjársjóð við fornleifauppgröft því enginn grafi fjársjóð, sérstaklega með svona verðmætum myntum, án þess að ætla sér að sækja hann aftur. Segja þeir að það hljóti því að hafa verið hörmulegir atburðir sem komu í veg fyrir að fjársjóðurinn væri grafinn upp af þeim sem gróf hann niður.