Rannsóknir benda til að það sé verra fyrir heilsuna að sitja í gluggasæti en við gang þegar þú ferð í flug, sérstaklega langflug. Þetta hefur ekkert með gluggann sjálfan að gera, geimgeislun eða hitastig eins og segir í grein á hjartalif.is. 

Það er þekkt að á löngu flugi geta myndast blóðtappar í djúpum bláæðum ganglima, fyrirbæri sem kallað hefur verið DVT (deep vein thrombosis). Slíkir blóðtappar eru ekki hættulausir enda geta þeir rekið til lungna og setið fastir í slagæðum þeirra (blóðtappi í lunga). Löng kyrrseta er stærsti áhættuþátturinn. 

Ef þú situr í gluggasæti er ólíklegra að þú hreyfir þig í flugi en ef þú situr við gang eða í miðsæti. Í gangsæti getur þú staðið upp og hreyft þig upp án þess að trufla sessunauta þína. Ef þú aftur á móti situr við gluggann ertu til vandræða í hvert sinn sem þú þarft að standa á fætur. Þú veigrar þér við að hreyfa þig því það getur truflað sessunauta þína sem kannski eru sofandi eða í miðri máltið.

Klíniskar leiðbeiningar um varnir gegn blóðsegum, frá American College of Chest Physicians (ACCP), beinast fyrst og fremst að þeim sem eru í áhættu en það eru einstaklingar sem hafa fengið blóðtappa áður, hafa brenglun í storkukerfi eða eru hreyfihamlaðir fyrir. Aðrir sem eru í áhættuhóp eru eldri einstaklingar, ófrískar konur, konur sem taka estrogen hormón, til dæmis p-pilluna og einstaklingar sem nýlega hafa gengist undir skurðaðgerð.

Ef þú ert í flugi sem er lengra en sex tímar er ráðlegt að standa upp reglulega og hreyfa sig. Einnig getur verið gagnlegt að spenna kálfavöðvana þótt þú sitjir í sætinu þínu. Ef þú ert í áhættuhóp getur hjálpað að nota teygjusokka, svokallaða flugsokka sem hægt er að fá víða. 

Ef þú ert í löngu flugi skaltu standa upp á 1-2 tíma fresti og ganga um. Hikaðu ekki við þetta, jafnvel þótt þú sitjir í gluggasæti og þurfir að vekja farþegana við hliðina á þér. 

Greinina má lesa í heild sinni hér.