Breytingarnar eru minniháttar, eða nokkrar millisekúndur á dag. Áhrifin af þessum breytingum geta þó verið gífurleg þar sem breytingar á tíma hafa áhrif á tækni á borð við GPS. Eins er hér um að ræða enn eitt dæmið um afleiðingar loftslagsbreytinga og þau áhrif sem manneskjan hefur haft á jörðina.
„Þetta er vitnisburður um alvarleika loftslagsbreytinga,“ segir Surenda Adhikari, jarðeðlisfræðingur hjá NASA og einn af höfundum rannsóknarinnar.
Þegar ísbreiður heimsskautanna og jöklar bráðna þá flæðir frá þeim í átt að miðbaug. Þetta veldur því að form jarðarinnar breytist, flatari við heimskaut og breiðari við miðbaug en áður. Þar með hægist á snúningu jarðarinnar. Líkja má þessu við það þegar fólk snýst á skautum. Þegar hendurnar eru dregnar nær líkamanum þá snýst fólk hraðar en þegar hendurnar eru útbreiddar þá hægri á snúningnum.
Jarðfræðingurinn Mostafa Kiani Shahvandi, sem eins kom að rannsókninni, segir að aðrar rannsóknir hafi bent til orsakasamhengis á milli lengri dags og aukinna jarðskjálfta. Hann segir við CNN að enn þurfi að rannsaka þessa kenningu betur en hún vekur þó upp áleitnar spurningar.
Benedikt Soja, annar höfundur rannsóknarinnar og prófessor við háskólann ETH í Zurich segir að heimurinn þurfi nú að horfast í augu við að manneskjan hefur nú haft meiri áhrif á legu jarðarinnar í tíma og rúmi heldur en náttúrulegir ferlar hafa gert síðustu milljarða ára.
Önnur rannsókn var birt í mars sem komst að þeirri niðurstöðu að þó að loftslagsbreytingar væru að hægja á snúningi jarðar þá væru ferlar innan möttuls jarðar þó mikilvægari og gætu verið að hraða snúningi og þar með stytta daginn. Höfundur þeirrar rannsóknar, Duncan Agnew, fagnar þó þessari nýju rannsókn sem hann segir veita mikilvæga innsýn í áhrif loftslagsbreytinga á snúning jarðar. Þar sé horf til margra ólíkra þátta loftslagsbreytinga og lengra til framtíðar heldur en hans rannsókn gerði.