Í Nevada fór hitinn í 49 gráður á sunnudaginn og var gamla metið þar með slegið hressilega. Það var 46 gráður en það var sett 2007 en á laugardaginn mældust einmitt 46 gráður í Nevada og var gamla hitametið þar með jafnað.
Sky News skýrir frá þessu og segir að hitinn sé sums staðar allt að 20 stigum hærri en venja er á þessum árstíma.
Þessum mikla hita fylgir auðvitað mikil hætta á að gróðureldar blossi upp og hafa slökkviliðsmenn einmitt barist við gróðurelda síðustu daga.
Veðurfræðingar telja ekki ólíklegt að fleiri hitamet falli í þessari hitabylgju.
Hitinn fór í 53,3 stig í Dauðadal í austurhluta Kaliforníu. Þar lést mótorhjólamaður af völdum hita og annar var fluttur á sjúkrahús, illa haldinn af völdum hita. Báðir voru í hópi sex mótorhjólamanna sem voru á ferð um dalinn. Hinir fjórir fengu aðhlynningu á vettvangi.
