Þetta er hár, rétthyrndur staur sem líkist einna helst einhverju úr vísindaskáldsögu. Hann fannst á Gas Peak göngusvæðinu sem er um klukkustundar akstur norðan við Las Vegas.
Þetta er ekki í fyrsta sinn sem staur af þessu tagi finnst í Bandaríkjunum og ekki minna dularfullt en í hin skiptin.
Hann fannst þegar lögreglan var við björgunarstörf í eyðimörkinni að sögn BBC. Það má kannski segja að hann líkist einna helst staur sem er í kvikmynd Stanley Kubrick, „2001: A Space Odyssey“, frá 1968.
Lögreglan hefur enga hugmynd um hvernig staurinn, sem er með spegilslétt yfirborð, endaði í eyðimörkinni. Hann hefur nú verið fjarlægður og fluttur á „öruggan“ stað að sögn lögreglunnar.
2020 fann þyrluflugmaður svipaðan staur þegar hann var við dýratalningar í Utah. Eins og nú, fannst engin skýring á því hvernig þessi dularfulli staur endaði í eyðimörkinni og skömmu eftir að hann fannst, hvarf hann. í kjölfarið fundust svipaðir staurar í Kaliforníu, Rúmeníu, Wales og Isle of Wight.
Margir hafa velt fyrir sér af hverju þessir staurar birtast og hver standi á bak við þetta. Bent hefur verið á að þeir líkist einhverju sem geimverur gætu hafa komið með til jarðarinnar en það er nú harla ólíklegt að svo sé.
Í kjölfar þess að fyrsti staurinn fannst 2020 beindist grunur margra að listamanninum John McCraken. New York Times velti því upp í grein hvort hann gæti verið maðurinn á bak við þetta en hann hafði áður gert listaverk sem líkjast staurunum. En það er ekki hægt að spyrja McCraken út í þetta því hann lést 2011.
Það er því enn óleyst ráðgáta hvaðan staurarnir koma og hver eða hverjir standa á bak við þetta.
