Margt bendir til að Danir taki hvatningu yfirvalda um að koma sér upp neyðarvistum til þriggja daga alvarlega. Troels Lund Poulsen, varnarmálaráðherra, kynnti ráðleggingar yfirvalda fyrir rúmri viku og síðan hafa verslanir upplifað mikla söluaukningu á ýmsum matvælum miðað við sama tíma á síðasta ári.

Forstjóri Salling Group, sem er stærsta smásöluverslunarkeðja landsins, sagði í samtali við Danska ríkisútvarpið að strax daginn eftir að Poulsen kynnti ráðleggingarnar hafi ákveðna vörur farið að seljast meira en venjulega. Til dæmis er söluaukningin á niðursuðumat 300%, meðal annars á niðursoðnum kjötréttum á borð við spaghettí í sósu, pylsum og kjötbollum.

80% söluaukning hefur orðið á túnfiski og makríl í dósum og 70% söluaukning hefur orðið á vatni í 2 líra flöskum.

Í leiðbeiningum dönsku almannavarnanna er fólk hvatt til að eiga birgðir til þriggja daga. Þar á meðal þrjá lítra af vatni á mann fyrir hvern sólarhring. Það sama gildir um mat, hann á að duga í þrjá daga. Þetta þarf að vera matur sem þolir að vera ekki í ísskáp eða frysti og helst matur sem ekki þarf að elda.

Fólk er einnig hvatt til að eiga gas til að geta hitað eða eldað mat ef svo ber undir.