Samkvæmt frétt Sky News þá sagði konan að hún og unnustinn fyrrverandi, nefndur HG, hafi gert með sér munnlegt samkomulag um að hann myndi aka henni út á ónafngreindan flugvöll, dvelja á heimili hennar á meðan hún var að heiman og hugsa um hundana hennar tvo.
CL, sem ætlaði að ferðast með tveimur vinum sínum til að sækja tónleika, sendi HG skilaboð kvöldið fyrir brottför og bað hann um að sækja sig á milli klukkan 10 og 10.15 næsta morgun. En hann sótti hana ekki og hún missti af fluginu.
CL sagði fyrir dómi að hún færi fram á að fá bætur greiddar frá manninum vegna þessa og áttu þær að dekka kostnað hennar við að taka annað flug næsta dag, akstur út á flugvöll og gæslu á hundunum. Hún fór einnig fram á að fá greiddan kostnað við kaup á miðum með ferju einni í desember 2023 en miðann keypti hún fyrir HG til að hann gæti heimsótt syni hennar. Hún sagði einnig að HG „njóti þess að dvelja heima hjá henni“ og hafi áður gætt hunda hennar.
Þau voru par í sex og hálft ár en slitu þá sambandinu og hættu að búa saman.
Niðurstaða dómsins
Dómstólinn komst að þeirri niðurstöðu að hafna bæri kröfum CL því loforð mannsins væru ekki ígildi samnings.
Krysia Cowie, dómari, sagði að til að samningur taki gildi þurfi ætlunin að vera að „koma á lagalega bindandi sambandi“. Pör, vinir og vinnufélagar standi fyrir viðburðum en ólíklegt sé að hægt sé að þvinga þá til þess lagalega séð nema viðkomandi geri eitthvað sem megi túlka sem svo að ætla megi að viðkomandi telji sig bundinn af loforðum sínum.