People skýrir frá þessu og segir að lögreglumaðurinn, hinn 26 ára Michael Christian Green, sé ekki lengur starfandi sem lögreglumaður enda er hann á leið í fangelsi.
Hann játaði brot sitt og var dæmdur í eins árs fangelsi. Að afplánun lokinni verður hann undir ströngu eftirliti í eitt ár.
Brot Green náðist á eftirlitsmyndavél í fangageymslu lögreglunnar í Pearl í Mississippi í Bandaríkjunum.
Í dómskjölum kemur fram að Green hafi handtekið mann á veitingastað eftir að til deilna og átaka kom. Maðurinn var fluttur á lögreglustöðina og settur í fangaklefa. Hann kastaði af sér vatni á gólfið eftir að lögreglumenn höfðu hunsað beiðni hans um að fá að nota salernið.
Þegar Green færði manninn til skráningar í fangageymslunni skipaði hann honum að „sleikja þetta upp strax“. Hann tók síðan farsíma sinn upp til að taka það upp þegar maðurinn sleikti þvagið upp og skipaði honum að „hrækja því ekki“. Maðurinn ældi ítrekað í ruslatunnu að því er segir í dómskjölum.
