The Independent skýrir frá þessu og segir að samkvæmt því sem WHO segi, þá séu það tóbak, áfengi, jarðefnaeldsneyti og svokallaðar ofurunnar kjötvörur sem eiga sök á fjölda andláta sem annars væri hægt að koma í veg fyrir. Stofnunin telur að á hverjum degi látist um 7.400 Evrópubúar af völdum þessara framleiðsluvara.
WHO telur að fyrirtækin, sem bera ábyrgð á þessu, trufli viðleitni yfirvalda í mörgum löndum við að draga úr fjölda krabbameinstilfella, hjartasjúkdóma og sykursýki. Vill stofnunin harðari löggjöf sem geti orðið til að koma böndum á starfsemi fyrirtækjanna og styrki um leið aðgerðir yfirvalda gegn lífsstílssjúkdómum. Segir WHO að margar af aðgerðum yfirvalda „lendi í vanda, seinki, verði mildari eða séu stöðvaðar“ af framleiðslufyrirtækjunum.
Tóbak er stærsti sökudólgurinn að því er segir í skýrslunni en það verður 1,15 milljónum manna að bana árlega en áfengi verður tæplega 427.000 manns að bana. Ofurunnar kjötvörur eiga sök á dauða um 117.000 manns og saltríkur matur verður rúmlega 252.000 manns að bana.
Þessu til viðbótar eru dauðsföll af völdum offitu, hás blóðþrýstings, hás blóðsykursmagns og mikillar blóðfitu en allt tengist þetta óhollum mat.
WHO segir að framleiðslufyrirtækin hugsi eingöngu um gróða og taki ekkert tillit til heilsufarslegra þátta. Af þessum sökum er þörf á bættri löggjöf að mati stofnunarinnar.
