Golfstraumurinn er hlýr hafstraumur sem á upptök sín milli Flórída og Kúbu. Hann streymir alla leið til Evrópu og ber með sér hlýjan sjó sem tryggir temprað loftslag í Evrópu og að ákveðnu marki í Norður-Ameríku.
Reiknilíkön sýna að Golfstraumurinn er að veikjast og hugsanlega er Atlantic Meridional Overturning Circulation (AMOC), sem Golfstraumurinn er hluti af, við það að hrynja. Ef svo fer mun það hafa afdrifaríkar afleiðingar fyrir loftslagið.
Live Science segir að í nýrri rannsókn, sem hefur verið birt í vísindaritinu Science, sé komist að þeirri niðurstöðu að ef það dregur úr streymi Golfstraumsins muni það hafa alvarleg áhrif fyrir lífríkið í sjónum því það treysti á næringarefnin sem straumurinn ber með sér í Norður-Atlantshafið.
Höfundarnir byggja niðurstöðu sína á rannsóknum á steingervingum og setlögum frá stuttu kuldaskeiði sem reið yfir á tímabilinu frá 12.900 árum til 11.700 árum síðan. Kuldakastið þá, sneri við hnattrænni hlýnun sem hafði verið í gangi.
Rannsóknin sýndi að streymi næringarefna í Norður-Atlantshafið minnkaði mikið á þessu tímabili og sultu lífverur í hafinu fyrir vikið, allt frá smæstu dýrum upp í þau stærstu.