Arkitektinn og meinti raðmorðinginn Rex Heuermann á yfir höfði sér enn eina ákæruna ef marka má frétt New York Post í dag. Þar segir að Heuermann verði dreginn fyrir dóm á fimmtudaginn þar sem hann verður ákærður fyrir fimmta morðið.
New York Post hefur þetta eftir heimildum og það sama segir miðillinn Newsday sem segist hafa fjölda heimilda fyrir því að á fimmtudag mæti Heuermann fyrir dóm í Riverhead til að svara fyrir enn eina ákæruna.
Um miðjan maí mánuð sneri lögregla aftur að heimili Heuermann og fjölskyldu í Long Island. Þar fór fram sex daga húsleit. Rétt áður bárust fréttir um að lögregla væri með umfangsmikla leit í gangi í Manorville. Þar fundust fyrir rúmlega tuttugu árum líkamshlutar þeirra Jessicu Taylor og Valerie Mack. Líkamsleifar þeirra fundust einnig við Gilgo-ströndina árin 2010-2011 á svipuðu svæði og lík þeirra fjögurra kvenna sem Heuermann er þegar sakaður um að hafa banað.
Fox fréttastofan greinir frá því að sönnunargögn hafi fundist við leit lögreglu í Manorville í apríl. Innan við mánuði eftir leitina þar mætti lögregla á heimili Heuermann með nýja húsleitarheimild. Fyrrum rannsóknarlögreglumaðurinn Paul Mauro, segir í samtali við Fox að líklega hafi lögreglan fundið erfðaefni í Manorville sem þau vildu bera saman við eitthvað á heimili Heuermann.
Heuermann er ákærður fyrir að hafa banað; Melissu Barthelemy sem var 24 ára vændiskona og sást seinast á lífi árið 2009, Maureen Brainard-Barnes, sem var 25 ára og sást seinast á lífi árið 2007, Amber Lynn Costello sem var 27 ára kona sem glímdi við fíknisjúkdóm og sást seinast á lífi árið 2010 og svo Megan Waterman sem var 22 ára fylgdarkona sem sást seinast sumarið 2010 á lífi.
Konurnar fjórar fundust á svipuðu svæði við Gilgo-ströndina, þeim hafði verið banað með áþekkum hætti, voru á svipuðum aldri, allar fremur smágerðar og höfðu lagt stund á vændi.
Við Gilgo-ströndina fundust þó einnig Jessica Taylor og Valerie Mack, sem báðar störfuðu sem fylgdarkonur. Búkur Tayor fannst í Manorville árið 2003 og útlimir hennar við Gilgo-ströndina 2011. Búkur Mack fannst í Manorville árið 2000 en svo fundust bein úr henni við Gilgo-ströndina árið 2011. Búkar beggja kvenna voru vafðir inn í plast. Þegar búkarnir fundust var farið að tala um slátrarann í Manorville, eða búkamorðinginn í Manorville.
Um tíma voru morðin eignuð smið að nafni John Bittrolff sem árið 2016 var dæmdur fyrir að myrða vændiskonurnar Rita Tangredi og Colleen McNamee. Bittrolff var búsetur í Manorville og starfaði sem smiður. Um tíma var talið að hann bæri ábyrgð á búkunum í Manorville og síðar líkunum við Gilgo-ströndina. Bittrolff hins vegar barði fórnarlömb sín til bana og skildi svo eftir úti í vegakanti. Ekki var vitað til þess að hann hlutaði fórnarlömb sín niður.
Rex Heuermann fylgdist náið með málum Bittrolff á sínum tíma og leitaði upplýsinga um hann á Google, eins og gögn úr leitarsögu hans á netinu hafa sýnt.
Einnig fundust líkamsleifar karlmanns, sem er talinn hafa verið asískur á aldrinum 17-23 ára. Hann fannst í kvenmannsfatnaði sem er talið gefa til kynna að um trans konu hafi verið að ræða. Svo var það kona sem ekki hefur tekist að bera kennsl á en hún hefur verið kölluð Peaches út af húðflúri sem hún hafði af ferskju. Hluti líkamsleifa Peaches höfðu áður fundust í Hampstead Lake þjóðgarðinum árið 1997 en við Gilgo-ströndina árið 2011 fundust bein úr Peaches og líkamsleifar 2 ára stúlku sem erfðarannsókn sýndi að var dóttir Peaches.
Loks var það Karen Vergata sem sást seinast á lífi árið 1996. Fætur hennar fundust sama ár við Fire Island. Líkamshlutar úr Vergata fundust svo við Gilgo-ströndina árið 2011.
Loks er það Shannan Gilbert sem var fylgdarkona sem hvarf í maí árið 2010. Það var leitin að henni sem varð til þess að öll sem eru talin upp hér að ofan fundust loks. Sjálf fannst Gilbert látin í mýrlendi ekki langt frá Gilgo-ströndinni. Lögregla telur þó að Gilbert hafi látið lífið að slysförum.
