Danir sem voru mjög léttir þegar þeir fæddust, eru í meiri hættu en aðrir á að þróa með sér sykursýki 2 og deyja af hjarta- og æðasjúkdómum fyrir aldur fram.

Þetta eru niðurstöður nýrrar rannsóknar frá Steno Diabetes Center Copenhagen. Rannsóknin verður birt í vísindaritinu Diabetologia.

Áður hefur verið fjallað um rannsóknina í þessu tímariti í kjölfar þess að vísindamenn birtu bráðabirgðaniðurstöður rannsóknar sinnar á síðasta ári. Þær vöktu mikla athygli víða um heim að sögn TV2.

Rannsóknin beindist að hjarta- og æðasjúkdómum en það er ekki það eina sem lág fæðingarþyngd getur haft áhrif á síðar á ævinni að sögn Allan Vaag hjá Steno Diabetis Center Copenhagen.

Í aldarfjórðung hefur hann verið með þá kenningu að það sé meiri hætta á að fólk þrói sykursýki 2 með sér ef fæðingarþyngd þess er lág og nú hefur kenningin verið staðfest með þessari rannsókn.

Þegar sykursýki 2 og lág fæðingarþyngd fara saman, getur það valdið enn fleiri sjúkdómum. „Maður er í hættu á enn alvarlegri veikindum og aukinni hættu á hjarta- og æðasjúkdómum,“ sagði Allan Vag í Go´ Morgen Danmark á föstudaginn.

Eins og staðan er núna þá horfir heilbrigðisstarfsfólk mikið á ofþyngd sjúklinga en Vaag telur að í framtíðinni eigi að beina sjónunum í meira mæli að fæðingarþyngdinni þegar kemur að því að veita sjúklingum meðferð.

Í rannsókninni var unnið með fæðingarvottorð allt aftur til 1920 til að skoða tengsl fæðingarþyngdar og hjarta- og æðasjúkdóma og sykursýki 2.

Notast var við gögn um 8.400 manns, sem greindust með sykursýki 2. Fylgst var með fólkinu í 8 og hálft ár.

Niðurstöðurnar eru að þeir sem vógu undir þremur kílóum við fæðingu, voru í 19,8% hættu á að fá hjartaáfall eða deyja af völdum blóðtappa. Hjá þeim sem vógu 3 til 3,7 kíló, voru líkurnar 16,9%.

Þeir sem fæðast léttir og fá sykursýki 2 eru einnig þeir sjúklingar sem eru í mestri hættu á að þróa með sér hjarta- og æðasjúkdóma og látast af þeirra völdum.