Afrek stúlknaliðs Queens Park Ladies í þriðju deild Bournemouth Youth Football League á Englandi hefur svo sannarlega vakið mikla og verðskuldaða athygli að undanförnu. Keppnin er fyrir lið skipuð leikmönnum 12 ára og yngri. Stúlkurnar kepptu í „strákadeild“ og er óhætt að segja að þær hafi rúllað henni upp.

Sky News segir að 12 lið hafi spilað í deildinni, stúlknaliðið og 11 lið eingöngu skipuð strákum. Stúlknaliðið vann 18 af 22 leikjum sínum og gerði 4 jafntefli. Stúlkurnar skoruðu 61 mark og fengu aðeins 11 á sig. Þær tryggðu sér deildarmeistaratitilinn örugglega.

Þegar þær höfðu lokið öllum leikjum sínum voru þær komnar með 58 stig, 16 stigum meira en liðið í öðru sæti en það átti þá tvo leiki til góða.

Það gerir afrek þeirra enn sætara að þeim tókst að sigrast á andstöðu yfirmanna breska knattspyrnusambandsins sem vildu í upphafi ekki leyfa þeim að spila í strákadeildinni og sögðu þeim að þær yrðu að spila í stúlknadeild.

En Toby Green, þjálfari þeirra, var svo sannfærður um getu liðsins að hann gafst ekki upp og hafði að lokum í gegn að þær máttu spila í strákadeild.

Á næsta ári munu þær spila í annarri deildinni í keppni liða fyrir yngri en 13 ára.