Nú geta íbúar í Uppsala í Svíþjóð gert gott betur en að nota Pokémonappið til að leita að Pokémonum í bænum því þeir geta notað nýtt app til að tilkynna stöðuvörðum um bíla sem er ólöglega lagt. Fá tilkynnendur 100 sænskar krónur ef tilkynning leiðir til þess að eigandi bílsins fær sekt.

100 sænskar krónur svara til um 1.300 íslenskra króna svo það er kannski eftir nokkru að slægjast ef fólk er í gönguferð og tilkynnir um nokkrar ólöglegar lagningar sem leiða til sektar.

Sænska ríkisútvarpið skýrir frá þessu og segir að íbúar í Uppsala hafi talið að hér væri um aprílgabb að ræða en svo er ekki.

Það er fyrirtækið Scout Park sem stendur á bak við appið. Til að geta notað það þarf viðkomandi að vera með póstfang í Svíþjóð og að hafa náð 16 ára aldri. Ef fólk uppfyllir þessar kröfur getur það notað appið á ákveðnum svæðum og leitað að og tilkynnt um bíla sem er lagt ólöglega.

Þegar kemur að því að senda tilkynningu er mynd af bílnum send í gegnum appið. Stöðuvörður skoðar síðan málið og gefur út sekt ef nauðsyn krefur.

Viðbrögðin við þessu hafa verið blönduð í athugasemdakerfum samfélagsmiðla. Sumir eru hæstánægðir með að geta orðið sér úti um smávegis aukapening og að um leið sé hægt að refsa þeim sem leggja til dæmis í stæði merkt fötluðum. En aðrir eru allt annarrar skoðunar og telja að samfélagið sé að þróast yfir í „kjaftaskjóðu samfélag“.