Lögreglan í Oklahoma hefur leitað tveggja kvenna logandi ljósi síðan á laugardag eftir að bíll þeirra fannst yfirgefinn úti í vegakanti.

Konurnar tvær eru Veronica Butler, 27 ára, og Jillian Kelley, 39 ára. Að sögn lögreglu eru konurnar vinkonur og voru á leiðinni að sækja börn Butler. Þær skiluðu sér þó aldrei á áfangastað og nokkru síðar fannst bíllinn sem þær óku yfirgefinn úti í vegarkanti og engin merki um hvað varð um vinkonurnar.

Manneskja náin Butler, sem vildi ekki láta nafns síns getið, sagði í samtali við ABC fréttastofuna að Butler hafi verið á leið að sækja sex ára dóttur sína og átta ára son sinn í sveitina í Oklahoma. Dóttir hennar átti afmæli og til stóð að fagna deginum.

Kelley hafi farið með Butler, enda séu þær vinkonur en Kelley er eiginkona nýja prestsins í heimabæ þeirra í Nebraska.

Konurnar voru að aka um 25 kílómetra leið og komust þær langleiðina en bíllinn fannst um 5 kílómetrum frá áfangastaðnum.

„Það er mjög erfitt að takast á við að einhver sem ég hef þekkt síðan ég var 16 ára sé horfin, þetta er mjög erfitt,“ sagði heimildarmaðurinn.

Lögreglan vildi ekki staðfesta að konurnar hafi verið sækja börn Butler og segir óljóst hvaðan konurnar voru að koma og hvert þær voru að fara. Eins sé óvíst hvernig konurnar tengist. Rannsókn sé enn á byrjunarstigi.

Heimildarmaðurinn segir aðstandendur Butler vona það besta en þó eru allir meðvitaðir um að eftir því sem lengra líður frá hvarfinu, því minni líkur séu á því að konurnar séu á lífi.

„Ég veit að fyrstu sólarhringarnir skipta mestu máli við svona leit og ég veit að nú hefur lengri tími liðið og það tekur virkilega á.“