Aðeins fjórum dögum eftir að Katie Higton, 27 ára, kærði fyrrum unnusta sinn, Marcus Osborne, til lögreglunnar myrti hann hana. Katie var hrædd við Marcus og óttaðist að hann myndi valda henni alvarlegum líkamstjóni eða myrða. Því miður reyndist hún hafa rétt fyrir sér.

The Independent skýrir frá þessu og segir að Marcus, sem er 35 ára, hafi verið dæmdur í ævilangt fangelsi í síðustu viku fyrir morðið á Katie, sem var fjögurra barna móðir, og unnusta hennar, hinum 25 ára Steven Harnett.

Aðeins fjórum dögum eftir að Katie kærði hann til lögreglunnar stakk hann hana og Marcus til bana á heimili Katie í Huddersfield á Englandi. Þetta gerðist 15. maí á síðasta ári. Það voru 99 stungusár á Katie og 24 á Steven, þar á meðal á kynfærum.  Þegar hann hafði myrt þau sagði hann: „Rómeó og Júlía geta svo sannarlega dáið saman núna.“

Dómarinn í málinu sagði við dómsuppkvaðninguna að morðin hafi verið „kynlífstengd“ og að Marcus hafi verið knúinn áfram af „sjúklegri afbrýðissemi“. Þess utan hafi morðið á Katie verið „miskunnarlaus árás á algjörlega varnarlausa konu“.

Marcus hélt annarri konu fanginni í húsinu yfir nótt og nauðgaði henni. Öll fjögur börn Katie voru í húsinu þegar móðir þeirra var myrt.