Frederick Ward eldri arfleiddi fimm sonardætur sínar að smáaurum í erfðaskrá sinni, en tvö yngri börn hans erfðu nær öll auðævi hans. Ward sem var fyrrum hermaður lést 91 árs að aldri árið 2020 og skildi eftir sig dánarbú að andvirði 500 þúsund pund.

Systurnar fimm fengu hvor um sig 50 pund samkvæmt erfðaskrá afa þeirra, sem í raun er aðeins tákræn upphæð, en afinn mun hafa verið mjög vonsvikinn og móðgaður yfir að engin systranna heimsótti hann á sjúkrahúsið þar sem hann lá fram að andlátinu. 

Elsti sonur hans, Fred yngri, lést árið 2015, og er hann faðir systranna fimm. Ward arfleiddi yngri tvö börn sín, Terry Ward og Susan Wiltshire, að meirihluta eigna sinna. Móðir systranna fimm og ekkja Fred yngri segir að eiginmaður hennar hefði snúið sér við í gröfinni hefði hann vitað hvernig sá gamli fór með systurnar. 

Systurnar fimm fóru með erfðamálið fyrir dómstól í Bretlandi, en töpuðu. Móðir þeirra telur að ekki hafi verið tekið tillit til lykilsönnunargagna fyrir dómi og að það hafi verið „margar alvarlegar spurningar um úrskurð dómarans.“

„Þetta snýst ekki um peningana. Hún telur að stelpurnar hennar hafi verið að berjast fyrir því sem pabbi þeirra hefði viljað og því sem afi þeirra hafði upphaflega lofað.

Það þarf að spyrja margra alvarlegra spurninga um úrskurð dómarans. Ann telur að sum lykilsönnunargögn virðist ekki hafa verið tekin að fullu með í reikninginn,“ segir heimildamaður náinn fjölskyldunni við MailOnline. Aðspurður hvort systurnar hygðust áfrýja dómnum svaraði heimildarmaðurinn: „Þær hafa ekki efni á því. Þeir þurfa nú þegar að greiða málskostnað beggja aðila.“

Í erfðaskránni sem gerð var árið 2018 lét Ward megnið af dánarbúinu renna til tveggja yngri barna sinna.Systurnar fimm, Carol Gowing, Angela St Marseille, Amanda Higginbotham, Christine Ward og Janet Pett, höfðuðu mál á þeim forsendum að þær hefðu átt að erfa þriðjungshlut föður síns af andvirði dánarbúsins. Þeir héldu því fram að erfðaskráin væri ógild vegna þess að systkinin, Terry og Susan, hefðu haft „ótilhlýðileg áhrif“ á Ward. Erfðaskráin hafi einnig gerð á tíma sem Ward var orðinn veikur maður og hræddur við Terry.

Í eldri erfðaskrá Ward átti dánarbú hans að skiptast jafnt á milli allra þriggja barna hans. Fred yngri lést eins og áður sagði árið 2015 og eftir það voru ekki mikil samskipti milli fjölskyldu hans og Ward.

Lögmaður systranna fimm sagði fyrir dómi að ósætti hefði komið upp milli Terry og Carol eftir deilur vegna eignar og að Ward hefði kvartað undan að vera sífellt beðinn um peninga af hálfu Terry og Susan. Vitni fullyrtu einnig að „þeim hafi verið sagt frá líkamlega ofbeldisfullri hegðun Terry við hinn látna.“

Terry og lögfræðingur hans Maxwell Myers neituðu harðlega þessum ásökunum.

Í úrskurði hæstaréttardómarans kom fram að það væri algjörlega eðlilegt og skiljanlegt að afi arfleiddi barnabörn sín að engu eða litlu ef samskipti milli þeirra væru engin eða takmörkuð. Taldi dómarinn ekki sannað að Terry og Susan hefðu þvingað föður sinn með neinum hætti.

Mæðgurnar hafa lítið látið eftir sér hafa hvað dómsniðurstöðuna varðar, nema Amanda sem sagði: „Við hittum afa reglulega.“

Sjá einnig: Vendingar í máli móðgaða afans – Barnabörnin sitja eftir stórskuldug