Einn alræmdasti glæpaforingi Haítí um þessar mundir heitir Jimmy Cherizier og gengur hann undir viðurnefninu „Barbecue“ eða „Grillarinn“. Að sögn kemur það til vegna þess að Jimmy hefur gerst sekur um grimmileg morð þar sem hann brennir fórnarlömb sín áður en hann lætur dýr éta líkin. Sjálfur hefur hann þó sagt að viðurnefnið sé eldra og megi rekja til þess tíma þegar móðir hans seldi grillaðan kjúkling á götum úti.
Hvað sem því líður er ljóst að Jimmy hefur mörg mannslíf á samviskunni. Jimmy þessi er einmitt sagður hafa verið sá sem fyrirskipaði áhlaup á tvö stærstu fangelsi landsins um helgina. Talið er að um þrjú þúsund hættulegir fangar hafi sloppið úr haldi.
Daily Star varpaði ljósi á þennan alræmda glæpaforingja sem er fæddur annað hvort árið 1976 eða 1977. Hann ólst upp í stórum hópi systkina og missti föður sinn þegar hann var fimm ára.
Áður en hann leiddist út á braut glæpa starfaði hann sem lögregluþjónn hjá ríkislögreglunni á Haítí. Þar kynntist hann glæpum vel og um tíma starfaði hann bæði sem lögregluþjónn og glæpaforingi.
Eftir að hafa kynnst lífi glæpamannsins betur stofnaði samtök þar sem meðal annars var lagt á ráðin um grimmileg morð. Hann er til dæmis sagður hafa fyrirskipað fjöldamorð í La Saline-fátækrahverfinu árið 2018 þar sem 71 lést og yfir 400 heimili voru brennd til kaldra kola. Hann er sagður hafa fyrirskipað fleiri fjöldamorð; til dæmis í Grande Ravine árið 2017 þar sem níu voru myrtir.
Þegar upp komst um skuggalegt hliðarstarf hans árið 2018 var hann rekinn úr lögreglunni.
Jimmy tilkynnti um stofnun glæpasamtakanna G9 árið 2020, en um er að ræða einskonar regnhlífarsamtök sem eru yfir minni gengjum á Haítí. Þar er Jimmy leiðtogi og er fullyrt að liðsmenn hópsins séu betur vopnum búnir en sjálf lögreglan á Haítí sem virðist mega síns lítils.
Jimmy segir að samtökin hafi verið stofnuð í þeim tilgangi að koma ríkum ráðamönnum frá völdum og bæta hag þeirra verst settu í landinu. Ýmsir efast þó um göfugan tilgang hans ef marka má frásagnir af morðum og limlestingum á óvinum hans.
Bandarísk yfirvöld halda því fram fullum fetum að Jimmy hafi fyrirskipað og tekið þátt í La Saline-fjöldamorðinu árið 2018. Þar voru fórnarlömb, meðal annars börn, dregin út af heimilum sínum og tekin af lífi. Líkin voru svo brennd, aflimuð og gefin dýrum. Árið 2022 lokuðu G9-samtökin fyrir aðgang að olíubirgðastöð landsins sem hafði mikil og neikvæð áhrif á efnahag landsins sem þegar stóð á brauðfótum.
Jovenal Moise, fyrrverandi forseti Haítí, er sagður hafa lokað augunum fyrir uppgangi Jimmy og fylgisveina hans. Síðan Jovenal var myrtur árið 2021 og Ariel Henry tók við sem forsætisráðherra og forseti hefur krísan aukist dag frá degi.
Segja má að allt hafi endanlega farið í bál og brand þegar Ariel Henry neitaði að fara frá völdum og halda kosningar í febrúar síðastliðnum. Hefur Jimmy kallað eftir því að glæpagengi landsins sameinist um að koma Ariel frá völdum, hvað sem það kostar.
