NBC og 9 News skýra frá þessu. Fram kemur að á fimmtudag síðustu viku hafi ástralska lögreglan skýrt frá þessu dularfulla og hugsanlega hörmulega máli sem snýst um sjónvarpsmanninn Jesse Baird og kærasa hans Luke Davies.
Í upphafi var tilkynnt um hvarf þeirra og kringumstæður þess væru dularfullar. Í kjölfarið hafa ýmsar skelfilegar upplýsingar komið fram.
Meðal þess sem hefur komið fram er að mikið blóð fannst á heimili Jesse Baird í Paddington, sem er úthverfi Sydney. Síðan kom fram að grunur léki á að Jessi og unnusti hans hefðu verið myrtir og að lík þeirra hafi verið falin.
Á föstudaginn tók málið nýja stefnu þegar fram kom að Beau Lamarre-Condon, 28 ára lögreglumaður, hafi gefið sig fram vegna málsins. Hann var áður unnusti Jesse Baird. Talið er að hann hafi notað lögregluskammbyssu sína til að drepa Jesse og Luke.
Lögreglan, NSW Police Force, segir að þrátt fyrir að Beau hafi gefið sig fram sjálfviljugur þá vilji hann ekki aðstoða lögregluna við að finna líkin.
Rannsóknarlögreglumenn hafa unnið hörðum höndum að því að púsla málinu saman til að geta fundið Jesse og Luke. Vitað er að Beua fór margar ferðir að afskekktum sveitabæ í Bungonia sveitarfélaginu. Í þessum ferðum keypti hann meðal annars lóð og slípirokk.
Lögreglan byrjaði á sunnudaginn að leita á Bungonia eigninni, meðal annars í litlu vatni á lóðinni. En þrátt fyrir að sjónir lögreglunnar beinist að Bungonia-eigninni, þá er ekki öruggt að það sé rétti staðurinn til að leita að líkunum.
Nú í morgun bárust þær fréttir að lögreglan hefði fundið tvö lík sem talin eru vera lík Jesse og Luke.