Ekkert hefur spurst til Samönthu síðan þennan örlagaríka morgun og virðist lögregla engu nær um hvað varð af henni. Mjög umfangsmikil leit hefur staðið yfir og útilokar lögregla ekki að einhver hafi rænt henni.
Shane Patton, yfirmaður lögreglu á svæðinu, tjáði sig í dag um rannsókn málsins við News.com.au þar sem hann sagði ýmislegt skrýtið við málið.
„Hvort það þýði að eitthvað saknæmt hafi átt sér stað veit ég ekki. En augljóslega erum við að vinna að rannsókn á hvarfi konu sem hefur saknað í umtalsverðan tíma,“ segir hann.
Þá ræddi fréttamiðillinn við Tim Watson-Munro sem hefur áralanga reynslu af réttarsálfræði. Hefur Tim meðal annars unnið við rannsóknir á sálfræðilegum þáttum afbrotamanna. Hann segir að hvarf Samönthu sé „óvenjulegt“ af ýmsum ástæðum.
„Þetta er móðir sem hverfur við tiltölulega venjulegar aðstæður – hún fer út að hlaupa og sést ekki aftur,“ segir hann. „Annað sem er óvenjulegt er að venjulega eru einhverjar vísbendingar sem lögregla getur unnið út frá,“ segir hann en fyrir því er ekki að fara í þessu máli.
Þá furðar Tim sig á því að lögregla hafi verið óvenjuþögul um málið síðustu daga. Veltir hann því upp að eltihrellir hafi mögulega verið búinn að fylgjast með ferðum hennar og kortleggja. Hún hafi því verið auðveld bráð þar sem hún fór út að skokka á afskekktum stað snemma morguns þar sem enginn var á ferli.
Hann viðurkennir að kenningin um eltihrelli sé hugsanlega langsótt en minnir þó á að raunveruleikinn er oftar en ekki skrýtnari en skáldskapur.
Tim segir að einnig sé ekki hægt að útiloka að hún hafi dottið ofan í gömul námugöng sem vitað er til að eru á svæðinu eða að hún hafi stungið af. Það sé ólíklegt enda bendi flest til þess að hún hafi lifað mjög hamingjuríku lífi.
Samönthu er lýst sem hraustri og heilbrigðri – bæði á líkama og sál – móður og eiginkonu sem elskaði að vera með fjölskyldu sinni. Eiginmaður hennar, Mick Murphy, steig fram í síðustu viku og biðlaði til almennings að hafa augun opin.
„Fólk hverfur ekki bara. Það hlýtur einhver að vita eitthvað,“ sagði hann.