Þetta kemur fram í fréttatilkynningu frá dönsku krabbameinssamtökunum þar sem segir að þetta sé niðurstaða rannsóknar sem rúmlega 521.000 manns, frá 23 löndum, tóku þátt í. Fólkið var á aldrinum 35 til 70 ára.
Rannsóknin beindist að reykingum, hreyfingu, þyngd og áfengisneyslu. Fólkið svaraði fjölda spurninga í upphafi rannsóknarinnar og síðan aftur eftir fimm til tíu ár. Því næst voru þátttakendunum gefin stig, frá einu upp í fjögur, í fjórum flokkum.
Þar sýndi rannsóknin að meira að segja litlar lífsstílsbreytingar skiptu máli.
Anja Olsen, hjá dönsku krabbameinssamtökunum, segir í fréttatilkynningunni að þegar horft sé á skalann frá 0 til 16 stig þá sjáist að líkurnar á að fá krabbamein aukast eða minnka ef heildarstigafjöldinn breytist bara um eitt stig.
Að hennar sögn skipta reykingar mestu máli. „Það er enginn vafi á að ef maður reykir, þá á maður auðvitað að hætta því. En við sjáum einnig að fyrir þá mörgu, sem ekki reykja, þá er ávinningur í hinum þáttunum,“ sagði hún.
Rannsóknin fjallar um að draga úr líkunum á lífsstílstengdu krabbameini á borð við í brjóstum, lungum, þörmum, maga, lifur og leghálsi.
Krabbameinssamtökin segja að fyrri rannsóknir hafi sýnt að hægt sé að koma í veg fyrir allt að 40% krabbameinstilfella á heimsvísu ef allir myndu fylgja ráðleggingum um að reykja ekki, drekka ekki óhóflegt magn af áfengi, hreyfa sig, borða hollan mat og passa upp á að vera ekki í ofþyngd.