Yfirvöld í Perú hafa heimilað mun fleira fólki að heimsækja bæinn Machu Picchu daglega en verið hefur. Í janúar var byrjað að leyfa 4.500 manns að koma þangað daglega en áður var þakið 3.800 manns. Líklega verður fjöldinn hækkaður enn frekar síðar á árinu, eða í 5.600 gesti daglega.

Sky News skýrir frá þessu og segir að embættismenn leggi áherslu á mikilvægi þess að vernda þennan sögulega stað og að það verði forgangsverkefni.

Breytingin er gerð til að reyna að styrkja ferðamannaiðnaðinn í landinu en hann hefur ekki náð sér á strik eftir heimsfaraldur kórónuveirunnar.

Áætlað er að 2,2 milljónir ferðamanna komi til landsins á þessu ári en það eru um helmingi færri ferðamenn en komu áður en heimsfaraldurinn skall á.

Machu Picchu er á heimsminjaskrá UNESCO og er  í Andesfjöllunum. Þetta er dularfullur bær sem Inkar reistu á fimmtándu öld.