Ung ítölsk kona var nýlega handtekin á eyjunni Ischia, grunuð um að vera með eitt kíló af hassi í fórum sínum. Á meðan hún beið réttarhalda var hún úrskurðuð í stofufangelsi og skyldi það fara fram heim hjá móður hennar.

En stofufangelsið heima hjá mömmu reyndist henni svo erfitt að í síðustu viku fór hún á næstu lögreglustöð og bað um að verða sett í fangelsi, hún gæti ekki lengur verið heima hjá mömmu og staðið í stöðugum deilum við hana.

SKY TG24 segir að henni hafi þá verið komið fyrir á stofnun á meðan ákvörðunar er beðið um hvort orðið verði við ósk hennar og hún sett í fangelsi fram að réttarhöldunum.

Unga konan, sem er 23 ára og býr í Pozzuoli, sagði að þeim mæðgum komi alls ekki vel saman og að hún geti ekki haldið það út lengur að vera heima hjá henni.

Vandræði konunnar hófust þegar lögreglan í Casamicciola stöðvaði hana við hefðbundið eftirlit. Þá fundust fíkniefni í fórum hennar. Þar sem konan hafði aldrei áður komist í kast við lögin var ákveðið að stofufangelsi væri góð lausn meðan réttarhaldanna væri beðið.

Það gerði stofufangelsið flóknara að bróðir hennar, sem er tvítugur, var einnig í stofufangelsi heima hjá mömmu.

Eftir að unga kona var komin í stofufangelsið gerði lögreglan húsleit heima hjá fjölskyldunni og fann þá hálfsjálfvirka skammbyssu sem talið er að sé í eigu bróðursins. Hann var því fluttur í fangelsi og rannsókn á málum hans hraðað.